“وطني الغربة”

انا من بلد بيعرف كل بيت بالحارة
وشو طابخين كل الجيران
هاد البيت طابخ ملوخية……وهاد البيت طابخ مقلوبة……وريحة الخيار يعني سلطة
والسمك شارح حالوا لحالوا؟؟!!
وذبح البطيخة فضيحة؟؟!!
انا من بلد القمر فيه بالصيف يعني سهرة
وكل عرس يعني دبكة!!
وكتب الكتاب يعني كنافة!!
انا من بلد كانت امي تقول يا ابني((غسل وجهك لانك ما بتعرف مين بيبوسوا،وكنس بيتك لانك ما بتعرف مين بيدوسوا))
وابي كان يقول: ((جارك اخاك.!اذا ما شاف وجهك بيشوف قفاك))
انا من بلد لما بيندق الباب بنتحزر بين بعضنا مين يا ترى؟؟!!
وبنقول يا ترى مين اجانا؟؟!!
هي رنة الجارة………سريعة وقصيرة!!
وهي رنة عمتي………ناعمة وخفيفة!!
وهي خبطة ابن الجيران…وهي خشخشة المفاتيح لا ابوي عم ينادي ويتنحنح ليتغطوا النسوان!!!!!
انا من بلد الذهب كان الاساور الرفيعة والمبرومة والحية
انا من بلد المنسف بينطبخ بالافراح والاتراح وكل ايام الجمعة……وشوربة العدس كل ايام رمضان……
بلد كل شي بيصير فيه بيستاهل يكون خبرية!!!!!
انا من بلد حتى حبال الغسيل بتحكي قصص،ولقاطات الغسيل بتنقل رسائل غرام!!
ونشر الغسيل اله اصوله عشان ما يقولوا عن الست عفشة!!
بلد كانت الست تقول((لو كانت اسوارتي وقية مالي عند جارتي غنيّة
بيت الجيران اول بيت بنزوره بالعيد لناخد اول عيدية!!!!والبيت يلي بيتحمل ولدنتنا وقت ندق على بابه ونهرب،ومنرش عتبته بالمي لما بندير البربيش لنرش الحارة بالصيف!!
والبيت يلي بنوقف قدامه لنوصله سكبة من طبخة اليوم…..كل يوم برمضان…..
بيت الجيران اول باب بيندق لما بيخلص الخبز على غفلة…..ولما ما بيلتقى ليمونة
ببلدي ما في قطة جوعانة…..وكلاب الشوارع شبعانة!!!!
وبكل حوش في داليه وفراش للضيف
ونمليه فيها المكدوس وتنكة الجبنة وزيتون وزيت وزعتر!!!
ببلدي كانت ايام الشتا يا عيني على ايامها..كانت الصوبة..ولهبها..عم يقمر الخبزات ويشوي الكستنا..
وكاسة الشاي يلي عم تتنقل من ايد لايد بجلسة فيها طنة ورنة!!!!
ببلدنا الغيرة بتشعل فينا مو بس اذا حدا اطلع او لطش اختنا….كل بنات الحارة اخواتنا……
نسيت اخبركن انو كل بيت فيه عسكري بكل اجازة اله بيكون فيها لمة للعيلة ليسمعوا قصص وحكايات عن البارودة والسفرطاس والوظيفة….
وبتسمع من جدك وعمك وابوك احلى حكايات عن البطولة والقومية
فلسطين فلسطييين!!!!!!!
حبيتها……حبيتها كتير كتيييييييير
حبيتها لهالبلد مع اني عايشة فيها!!!!
لكن….
لما نعيش في الغربة!!!!
في الغربة اذا اندق الباب بنقول غريبة مين بدو ييجي عنا؟؟!!
ما النا حدا..
وحتى في العيد لما يضل الواحد في البيت كل ايام العيد ويستنى يمكن حد يدق الباب او نخطر على باله…
ولما تشوف حد في الصدفة وتتعرف عليه وبالاخر يطلع من بلدك او حتى من نفس العيلة وانتوا ما بتعرفوا بعض…..
ساعتها بتعرف شو يعني غربة؟؟!!
وشو يعني انا بلا وطن؟؟!!